لحظه جمْعتني مْعاه . . مْن العالمْ الآخر !

[ं Ms.CanoЙ]

السلام عليكم ورحمة الله وبركاته

خلونا انكون حلقة رعب .. وكل واحد يقول الي عنده من قصص الجن والقصص الغريبه الي سمعها او الي قراها ..

وببتدي بحزاية يدتي ...

عندي لكم حزايه عن يدتي العوده ... وفيها سوالف جن!

بس أخاف اتخافون وتحلمون بس ..وتدعون علي وتهوق فيكم

اذا تبون تسمعونها افتحوا عيونكم زين وقروها عدل.. واذا اتخافون ..قلبو ويهوكم ..

لحد يقول جروح ماقالت!

*******
اوكي تبون الصج هي ..ماتخوف تخوف ..لأ .. بالعكس فيها عبره ..

والصراحه مانعرف مدى صحتها .. هي صج ولا خيال ..بس الوالده تقول انها صج

وسمعت من الوالده القصه.. والوالده الله يحفظها .. اتعرف حق سوالف الحمل والولاده والمساد الي تحتاجه الحامل .. وهي تعلمت بعض الامور هذي من امها الله يرحمها وأمها كانت ولاده - دايه ..وأمها بعد اخذت المهنه من امها ..يعني متوارثين المهنه لي جو عند جيل الوالده والحقولهم على كم معلومه بس .. ستفدنا منها حنا مع بنات الفريج مؤخرا ..

..الوالده تقوال ان ام ام ام امها كانت ولاده (دايه ) مثل ماذكرت لكم سابقا ..

والحين ..صلوا على النبي وذكروا الله ..

تقول الوالده الله يحفظها عن يدتها العوده ..

في يوم من الايام كان عندها ولاده ... وماخلصت الا بعد المغرب ..

وهي طالعه ..قابلتها وحده ..اسألتها : انتي ام فلان الدايه ؟
قالتها يدتنا : أي انا هي !
قالت المره : طيب ولي يسلمج عندنا ولاده متعسره .. ومدحولنا فيج .. وجيتج علشان اتشوفين بنتنه تراها تعبانه وايد ..
قالتلها اليده : مب مشكله دليني على بيتكم بسرعه خل نلحق عليها ونشوف عوقها

مشت مع المره ودخلتها بدواعيس ..لين اوصلوا عند شجرة سدر ..
قالتلها المره : اسمعيني زين ..احنا الحين تقريبا وصلنا ..بس اطلب منج طلب قبل لاندخل البيت ..
قالتلها : آمري وان قدرت على طلبج مايصير خاطرج الا طيب ..
قالتلها المره : الكلمه الي دايم تذكرينها على اللسانج ولي تبتدين فيها شغلج لاتقولينها بالمره لي تطلعين من عندنا ..فهمتيني!<< عرفتوها !؟
دخل في قلب اليده شي من الخوف وسألتها: ليش!؟
قالت لها: من غير ليش ومن غير اسأله ..
من الخوف قالت اسايرهم وطلع سالمه ولا ارفض لهم طلب .. ويضروني
قالتلها: خلاص ماراح اذكرها ..
قالتلها المره : من هالطريج بربط عيونج .. وخمس دقايق بنكون وصلنا
وربطت عينها ..واخذتها من ايدها .. ومشت فيها ..
وبعدها شلت الرباط عن عينها ..
شافت نفسها في بيت عادي وقدامها مره تطلق ومتعسره بولادتها ..
اركضت عليها بسرعه وقامت بالواجب معاها .. لي ولدتها .. وليمن تطمنت على سلامتها وسلامة الياهل ..باركت لهم ..
وقالت للمره : انا سويت الي علي والحين ابي اروح بيتنا ..الوقت متأخر
اشكرتها المره ..واربطت عينها ..واخذتها من يدها .. وبعد 5 دقايق فكت الرباط
ولا اتحصل نفسها عند شجرة السدر .. ومشت معاها بعدها لين الطريق الي اخذتها منه ..
وسألتها الحين ادلين طريقج ولا هم تبيني اوصلج ..
قالت لها اليده : خلاص دليت طريجي ..

قالت المره عندي شي لج : طلعت من جيبها ورق سدر وعطتها اليده .
استغربت اليده .. بس خافت تنتقد او تقول شي ..اخذت ورق السدر وحطته في ملفعها وربطته
المهم وبعدها قالت :بسم الله الرحمن الرحيم ..
ارفعت عينها مالقت المره قدامها ..كملت طريقها وهي تقرى المعوذات على نفسها
قبل لاتوصل البيت ..فتحت ملفعها وشافت السدر ..قالت وش لي حاجه فيه .. كل هالخوف والتعب وآخرتها سدر..
وقامت وغلطت السدر تكرمون بالزباله .. وظلت ورقة سدر متعلقه بملفعها ..
وراحت البيتها وحطت راسها ونامت ..
قامت على اذان الصبح تتوضى ..البست ملفعها اتصلي ..حست بملفعها ثـقيل ..
إتشوفه ..ولا ليرة ذهب معلقه بملفعها ..وغبرة ذهب .. شالسالفه .. تذكرت ورق السدر .. على طول اركضت تكرمون للزباله
بس تدرون ماحصلتها .. وتحسفت واايد انها استخفت بورق السدر وستعيلت برميه ..
كانت همجه .. مب هينه ذيك الايام..

بس المقرود مقرووود ..خخخخ << وهذي طبعا مو من ضمن القصه

وتوته توته وخلصت الحدوده

ها ..ماتخوف شفتوا ..؟ الي خاف يرفع ايده ..

يعطيكم العافيه .. تبون غيرها!

اذا تبون غيرها..

خلونا نسمع قصصكم .. الي عنده قصة رعب يحكيها لنا ..هني ..في حلقة الرعب ..

ننتظر قصصكم ...؟!



م.ن

[ برنسس قطر ]

[منـي خـذوكـ]

قصه حلوه وروعه

بس عندج خطاء مطبعي

وقامت وغلطت السدر تكرمون بالزباله

خربت عل الاندماج

قواج الله في انتظار جديدج

[lady of thin]

حلووه والله ياريت لو تنزلين غيرها انا احب سوالف الرعب

يعطيك الف عافيه برنسيس قطر

دمتي بحفظ الرحمان

[ं Ms.CanoЙ]

[ ربي يسلمكم حبايبي عالمرور ]

[ منوريـن ] ^^

[Bnana]

تسلمين يالغلا ..

حلوه القصه .. هع

اندمجت فيها ..

[سكر نبآت]

[جيدّ ..]


بنتظـآآر القصص .. =)

[ं Ms.CanoЙ]

ربي يسلمكم عالمرور ^^

منورين ^^