يأهل قطر عندكم مزيون ..

[.قطري مزيون.]

حسبي الله على بليسك
والله قهرتني توني مندمج خلص الجزء
يالله الله يخليك كمل القصه

[راضـ نمله ـخ]

الجزء الثالث و العشرين


ودخلوا المجمع وتموا يتسووقوون .. ويتشرووون .. البنات بعد ماخلصوا دواااره وتشري فالمجمع قرروا يتعشوون .. طبعاً ناصر كاان تعباان ومنهد حييله منهم .. بس مابيييده شي يسويييه .. مايبي يكسر بخااطرهم .. المهم راحوا المطعم .. وآمنه كانت مقهوووره منه .. طول الوقت وهي تفكر بشي اتسويييه يقهره .. واول ماوصلوا طلبوولهم وتموا يسولفون

شوق : شرايك ناصر توديـنا بعد ما ...........

ناصر قاطعها : بس جب جب .. عطييتكم ويه .. لحد اهني وخلاص

شوق برطمت : انزيين انا ماقلت شي

عهود : قصدها بعد مانخلص تودينا البيت

ناصر : ايييه باااين

دانه : وبعدين معكم فشلتوونا قداام الاوااادم .. بس خلاص انطموا

ناصر يشووف آمنه : شفيج انتي ساكته ما تتكلمين

آمنه : شدخل ويهك .. وشووي ووصل الاكل وتموا ياكلوووون .. وبعدها آمنه استأذن وقالت انها بترووح تغسل يدها بالحمام " الله يعزكم " .. وهي رايحه صووب الحمام .. شافت الجرسوون رايح لطاولتهم ومودي الفاتوره .. والا تناادييه : لوو سمحت

الجرسوون : نعم ..

آمنه : عطني انا بدفع الحسااااب .. آمنه تدري بهالحركه راح تقهر نااااصر .. لان عييب البنت تدفع والرجال موجود

الجرسون : لا بس الاخ عم بيندهلي لألي ..

آمنه : لا معلييك نحن متفاهمين .. يلا عطني الفاتوره .. وعطاها

وآمنه يت بتحط البيزااات بس اول بتشووف صووب الطاوله واتشووفهم اذا منتبهيين لها او لاا .. ومحد كان منتبه .. مره وحده جت شوووق وشافتها والا اتصاارخ : ناااااااااااااصر

نااصر جاا بسررعه وشاف آمنه يالسه تدفع الحساب : انتي شقاعده اتسوييين

آمنه بهالوقت توترت : هااا .. لا ...

ناصر عصب : ردي بسرعه مكاااانج ..

آمنه : بس ..

ناصر : لا بس ولا شي .. يلا ردي .. وراحت آمنه صوب الطااوله .. وناصر دفع الحساب .. وقالهم بسرعه يطلعون .. وكاان معصب ع الاخييير من الحررركه .. اول ماوصلوا السياره

ناصر : انتي كيف اتسوين هالحرررركه ..؟؟

آمنه : انااا ماا كاان قصدي

ناصر : بس جب ولا كلمه .. ولا كني رجال واقف قداامج .. تجين انتي وبكل سهوله تدفعين الحساب .. هذا العشم فييج يا بنت خااالتي .؟؟؟ .. بس صدقيني لو تكررت ماتلومين الا نفسج .. والا ليش تتكرر انا ماني موديكم ولا مكاان بعد هاليووم .. اكتشفت انكم ماتستااهلوون

آمنه طوول الوقت ساكته ومب عارفه شتقوول ياخي وربي مدري ليش سويت هالحركه مافكرت كيف بتكون النتيييجه .. اوووووووف .. يلا الله كرييم .. ووصلوا البيت ونزلهم ناااصر وراااح
واول مادخلوا البيت

شووق : انتي كيف اتسوين جي ..؟؟

آمنه : شووق لو سمحتي .. ممكن ماتعيدين واتزيدين .. مب ناقصني الا انتي بعد ..

عهود : بسكم عاد .. خلاص سالفه وصارت

دانه مره وحده ضحكت : ههههههههاااي حررررركات يا اموووون .. محد كاان يستجرأ يسويييها .. ياخي وربي لو عندي هالجرأه اللي عندج جااان انا بخييير

آمنه ابتسمت : وربي محد فاهمني غيييرج .. وراحوا فووق وكملوا سوالفهم

وبعد سوالف وعبط .. تذكرت آمنه ان سعوود اخووها قالها اول ماترجعيين تعاليلي ..

آمنه : يلا انا استأذن

دانه : على وييين ..؟؟

آمنه : لا تذكرت ان سعوود يباااني ..

شوق اول ماسمعت طاري سعوود فز قلبهاا .. ااااااه يا سعوووود .. لين متى بتم جي ..؟؟ ..

عهوود : وش يبغى منج ..؟؟

آمنه تعمدت هالحركه : يباااني ازووجه

شوق شافتهااا وباين عليها الصدمه ..

دانه : صججججج ..؟؟ .. يعني عزم ان يتزووج ..؟؟

آمنه : يس

دانه : ومن بياخذ ..؟؟

آمنه : والله هو قالي اختاارله .. بس انا حصلت له بنت الحلال اللي تنااسبه

دانه : من .؟؟

آمنه : انتي وفي غييرج

دانه : وجع يااا امووون خخخ

آمنه : لا اتمصخر والله مدري شو يباا ..

شوق ارتاحت يوم عرفت ان هاي بس كلااام .. ماتبغى انه يتزووج .. ماتقدر .. حتى لو كاانت متزووجه .. صج ان انانيه منهاا بس ماتدري ليش ..

آمنه : يلا جااو .. وراحت عنهم .. والبنات راحوا بيووتهم

في الامارات

منصوور كان يالس ويا شمسه اخته .. وهي تحن وتزن فووق راسه .. وهو خلاص طفح الكييل منها

منصوور : بس عاااااااااااد .. متي وانتي تحنين

شمسه : تكفه منصوور ظهرررني .. والله مليييت .. يعني نحن مأجزين من متى .. محد يفكر يظهرني ..

منصور : اووف انزييين روحي تزهبي .. بس اول شي استأذني من الماما

شمسه وهي ميته من الونااسه : اوووووووووووووووكي

وراحت شمسه وتزهبت .. ومنصوور فكر ان يتصل لآمنه .. واتصل وجااف ان موبايلها مغلق .. طبعاً كاان متصل على خطها الاماراتي .. وهالخط نقدر انقوول ان على الدنياا السلام ..

منصوور : اوووف وقتها هاي تغلق موبايلها .. خلاص ماعدت اتحمل

شمسه من ورااه : ترمس امنووو ..؟

منصور انتبه لها : ها .. لا محد

شمسه : حررررركات .. ظهر عندك سواالف بطاااليه .. ماهقيتها منك يا اخوووي

منصور : ثمني رمستج لا كف .. شووفي من بيظهرج

شمسه باست راسه : لالا والله اسفه .. ماعييدها يا احلى اخوو فهالدنيا .. يا دنيتي كلهااا .. يا حبي الاول و ......

منصور قاطعها : انزين جب .. ويلا امشي ..

شمسه : اووكيك يلا سريينااا

وراحووا ومنصوور طول الوقت يفكر كيف يووصل لآمنه خلاص مب قادر يسكت اكثر .. لين متى ..؟؟ .. خلاص تعبت .. اووف .. اخرتها برووح قطر .. والله شكلي جي بسووي .. مافي الا هالحل ..

شمسه : هااا يالحبيب ويين سرحت ..؟

منصوور يتمصخر : سرحت فييج

شمسه شافته بنص عييين .. وهو يضحك .. وتم يحوطهااا ووداها كم من مكاان عقب رجعووا ..


وعند مــوزه .. كانت يالسـه مع حســن .. وقالت له تبا تظهر .. ملت من البيت ومن كل شي .. وقالت تبا تغيـر جوو .. وحسن ما رفض طلبها وعلى طوول قالها تجهزي .. وتجهـزت .. وساروا .. بالسيااره

حسن : موزه صاير شي معج أنتي وزايــد

موزه توترت : لا مااشي ليش ..

حسن : هيه واضح .. بس خل يرد من السفــر

موزه لاشعوريا : مسااافر .؟

حسن : حتى ماتدرين عنه مساافر وصارله كمن اسبووع .. موزه قولي لي وشو صااير من بينكم ..

موزه : حسون والي يسلمك .. الحين مالي خلق ارمس


حسن : الحين بسكت .. بس تقولين لي فااهمه ؟

موزه .. : ان شااء الله يصير خيــر

في قطــــــر

في الميلس عند الشباب

طلال .. كان قاعد وياا رااشد .. ويشكيله حاال البنااات اللي ملعوزيينه

راشد يضحك علييه : ههههه والله مب منهم .. منك انت ..

طلال : ياخي خلاص تمللت .. وكل وحده جايتلي من صووب .. وحده اتقوولي ويين الوعد اللي وعدتني ايااه .. هي تحسبني اني بالعشريين .. وانا قايل لهاا اني بتزوجج خخخخ .. والثانيه اتقوولي .. متى راح نتقااابل ..؟؟ .. والثالثه تشكي حالها ان اهلها عرفوا عنها .. انا شسويييلهم

راشد تم يضحك ضحك مب صاحي : ههههههههه بالله علييك انت ويهك ويه وااحد بالعشرين .. لا زوااج بعد

طلال : ماتاكل تبن شووي .. انا اشكيلك الحال وانت تتطنز علي ..

راشد : انا ادري عنك .. هههههههههههه ودخل علييهم نايف وشاف راشد ميت من الضحك ..

نايف : ها ها .. وشوو صااير .. شوي شوي يالحبيب

راشد : تعااال اسمع كلاام ولد اخووووك هههههههههههه

طلال : اوووف .. والله الحق علي اني قاعد اشكييلك .. مالت عليك وعلى اللي يشكييلك ورااااااح

نايف يضحك : هههه شفييه هذاا ..؟

راشد : تقدر اتقوول تخبل ..

نايف : يلا ماعليينا .. المهم نطلع ..؟؟

راشد : يلا .. وطلعوا

ومن صووب امنه .. آمنه راحت بييت سعوود .. لجل اتشوووف اخوووها .. ودخلت البييت .. وكان البيت ظلاام .. وكنه محد فيييه ..

آمنه : يعني معقووله سعود مب موجود .؟؟ .. يمكن فحجرته ..

وراحت صووب حجررررته .. وشافت ان الغرفه مقفووله .. يعني هو فيها .. وتمت اتطق الباب بس هوو مايرد .. وتمت على هالحال لين ما طلع لهااا

سعود وحاالته حاااله : ها امون .؟؟

آمنه شافت ان ويهه اصفر وشكله رايح فيها : سعووووود بلاااااااك ..؟؟

سعوود : ليش شفييني ..؟

آمنه متخرعه : ليش جي شكلك ..؟؟ .. سعوود انت تعباان ..؟ .. حاس بشي ..؟ .. قوولي يا اخووي تكفه لا تخووفني علييك ..

سعود ابتسم وباليالله بعد : لا مافيني شي .. بس تعب شووي ..

آمنه : تكفه سعوود تعال انسير المستشفى

سعود : لالالا .. مافيني شي .. بس احس اني ابا ارقد ..

آمنه عينها دمعت : حسبي الله ونعم الوكييل ع اللي كاان السبب .. لا بارك الله فيييه

سعوود : امنه لا تدعين على حد .. خلاص انتي رووحي .. وبعدين اشووفج .. لاني تعبااااااان وابا ارقد

آمنه اتصيييح : ربي لا يوووفقهم .. ولووت علييه بالقووو : سعووود تكفه لا اتسووي جي بنفسك .. عشاني والله انا من لي غيييرك اهنا .. تكفه واللي يرحم واالدييينك

سعوود ابتسم : خلاص صدقيني مافيني شي .. بكره بتشوفيني نفس الحصاان .. واودييج المكان اللي تبيينه

آمنه ابتسمت .. وسعود مسح دمووعها : خلاص مابي اشووف هالدمووع ..

آمنه ضحكت : انشالله

سعوود : يا زيينج الحيين .. يلا رووحي ترا اخرتيني عن مووعد رقاادي .. الحين بيطووفني الحلم ..

آمنه : يلا اوكيك .. باجر بشووفك ..

سعود : اووكيك وباسها على راسها ودخل حجرته وقفل الباب

آمنه بخاطرها اتقص على منووو يا سعوود ان مافييك شي .. لو اتقص ع الدنيا كلها ماتقص علي .. كل هاي من شووق .. الله يساامحج داام جي سوييتي فأخوووي .. ورااحت يلست ع الكنبه .. وانسدحت علييها .. وتمت اتفكر .. وبعدها راحت البيت العود


وعند عبدالعزيز ومريم .. عبدالعزيز كاان تواا رااجع البيت .. ومريم كانت ترقد سعووود .. دخل عليها عبدالعزيز وشافها وابتسم

عبدالعزيز راح لها وباسها ع راسها : ربي لا يحرمني منج يا اعز نااسي

مريم ابتسمت له : ولا منك .. اخبااارك ..؟

عبدالعزيز : والله منهد حيلي من الدوااام .. وفيني رقاااد

مريم : خلاص يلا رووح انسدح وانا برقد سعوود وبجيييلك

عبدالعزيز : خلي سعود عنج وتعالي

مريم : دقيقه الحيين بيرقد

عبدالعزيز : ربي يصبرني عليج وعلى ولدج .. يلا خلصي بسرررعه .. انا مشتااقلج

مريم : خلاص دقيقه بس .. انت على ما تبدل ثياابك بتحصلني موجوووده ..

عبدالعزيز : خلاص اوووكيك .. وراح عبدالعزيز يبدل ثياابه .. وشوي والا تدخل عليه مريم

عبدالعزيز : هلا هلا ..

مريم ضحكت : اهلين اهلين ..

عبدالعزيز : ها الجحش رقد ..؟

مريم ضربته على كتفه ع الخفيف : حراام عليك لا اتقول عنه جحش

عبدالعزيز : خلاص بقول عنه وحش ولا تزعلين هههههههههه

مريم : هههههههه ولا وحش ..

عبدالعزيز باسها على خدها .: خلاص ولا وحش .. انتي وولدج اغلى اثنين عطااني ايااهم ربي ..

مريم : حبيبي انت

عبدالعزيز : احبببج ..


في الامــارات ..

موزه بعد ما دورها حسن بمول الامارات وتعشـوا .. قبل لايطلعون قالت له تبا تسير ستاربوكس .. وسار معها .. وهنااك صادف جاسم .. وجاسم بعد انتبه له وقاام وسار صووبه يسلم علييه .. وجاسم انتبه للي مع حسن .. عرف انها موزه .. بس هي كانت متغشيه .. وقلبه عوره .. بس مابين هالشي .. وبعد ماسلم عليه .. راحوا ياخذون لهم موكاا .. وطلعوا

ولما رجعوا البيت شافوا سعيد يالس يلعب مبااراه رووحه ..

حسن : شو عندك يالس بالبيت تلعب رووحك ..

سعيد : وعليكم السلام .. من وين جاين هالحزه ..

حسن : طلعنا نفتل ورجعناا

سعيد : زين تعال العب .. وحسن تم يلعب مع سعيد .. وموزه سارت غرفتها واتصلت بآمنه ..

امنه اول ماشافت الرقم استاانست .. وردت عليها على طوول .. وبعد سوالف وهذره فوق الساعتيين .. سكروا التلفون وساروا يرقدوون ..

اليوم الثااني ..

آمنه قامت من وهل ونزلت تحت عند جدتها .. هي موتها وقعدة جدتها تحب تسوولف معها وتيلس معها .. وخصووصا الصبح تحس برااحه اكثر .. مع انها ناامت متاخر شووي ..

آمنه : صباااااح الخير يااعسل .. وباست راس جدتها

الجده : صبااح النور

وسارت صوب جدها وباست راسه .. : صباح الخير ابوويه ..

الجد : صبحج الله بالنور ..

وتمت قاعده تسوولف معهم .. الا جوالها يــرن وشافت رقم ابوهاا .. وردت عليها وسولفت معه وبعدها عطت جدها وجدتها يسوولفون مع ابوهاا .. وبعد ماخلصوا سكروا .. واستأذنت منهم قالت بتطلع بالحووش بالحديقه الي ورى .. وطلعت وشافت ظبيه تلعب مع السلحفاه ..

آمنه : صبااح الخير

ظبيه تقدمت من امنه وسلمت عليها

آمنه : شو هالسلحفااه .. من وين جايبته

ظبيه : من قبل شوي شريته .. طلعت مع ابووي وخليته يشتريلي ..

آمنه ابتسمت .. : اوكي من يالس في بيتكم .. ولا كلهم رقوود ..

ظبيه : عهوود راقده .. ودانه على الكمبيوتر كالعاده ..

آمنه : اوكي بسيــر لهاا ..

وراحت امنه بيت بومحمد .. ودخلت وشافت ام محمد يالسه مع ام فيصل .. وسلمت عليهم .. وام محمد عرفت ام فيصل على امنه .. وبعد شووي استأذنت منهم .. وراحت عند داانه .. ودخلت الغرفه ..

ودانه حزتها كانت ترمس ربيعتهاا .. آمنه : بوووووو

دانه تخرعت : اووف خرعتيني .. من وين طلعتي انتي

آمنه ضحكت : هههههههههه من فووق السما ..

دانه : ملااك وانا مدري .. المهم شمصحيج بدري ..

آمنه : الي مصحيج ..

دانه ضحكت : ومن قال لج اني نمت .. سهرانه على النت

آمنه بطلت عينها : شوو .. صج فاضيه ... كان جيتي سهرتي معي

دانه : مره ثاانيه ..

آمنه تناظر الشااشه : المهم شتسووين ..

دانه : اسولف مع رفيجتي على المسن ..

آمنه : شو هااي المسن ..

دانه : يعني تسولفين مع ربعج فيــه .. قربي شووفي ..

آمنه : هيه قصدج ماسنجر هههههه

دانه : خخخخ كل نفس الشي

آمنه : والله ماعرف لهالسوالف .

دانه : تبيني اعلمج .. صدقيني بتستاانسين ..

آمنه : صدق .؟

دانه بعبط : هيه صدق ..

آمنه ابتسمت : اوكي علميني ..

وبعدها تمت دانه تعلم آمنه على المسن .. وكيف تسووي ايميل .. وكيف ترااسل .. وبعدها علمتها على مواقع على النت .. وشووي على المنتديــات .. وبعد مامر الوقت .. آمنه شافت الساعه

آمنه : باااااااااااااااااااااااال

دانه تخرعت : شفييج ..

آمنه : شوفي السااعه .. مر الوقت .. والله ماحسيت به عااد صار 1

دانه : هههههه النت يضيع الوقت ..

آمنه : من الساعه 9 وحنا يالسين شدعوه .. بسرعه مر الوقت .. يلا انا بسيير اصلي ..

دانه : ههههه اوكي انا بعد بروح اصلي

آمنه : انتي صلي وسيري رقدي .. أنا برووح البيت ..

دانه : اووكي .. ياقلبي الله معج

آمنه : صحي عهود خل تصلي .. وبسها رقااد .. بعدها قوليلها تجي عندي ..

دانه : صاااار ..

وبعدها راحت آمنه البيت العوود .. وبطريجها شافت راشد وناايف ..

نايف : من وين جاايه .؟

آمنه وهي مستعيله : من بيت خالي عبدالله .. وبسرعه بدون ماتسمع ردهم راحت عنهم .. ودخلت البيت وراحت فووق وتوضت وصلت ..



ومن صووب مريم وعبدالعزيز .. يالسين يتجهزووون لانهم بيروحون بيت جد مريم .. كانو مسويين عزيييمه لولد عمها سالم .. كاان جاي من برع يدرس ..

مريم : ها حبيبي خلصت ..؟؟

عبدالعزيز شافها وحس بشي : اي حبيبتي .. رووحي سخني السياره على ما اجي

مريم : خلاص اووكيك

عبدالعزيز حس بدووووخه وقعد ع الكرسي : اااااااااخ

مريم تخرررعت وراحتله : شفيييك حياتي في شي ..؟؟

عبدالعزيز شافها : لا ولا شي .. بس شوويه تعب

مريم : لااا مايصير جي امش انرووح المستشفى

عبدالعزيز : قتلج مافيني شي .. يلا رووحي

مريم : عبدالعزيز عشااني خلنا انرووح المـ ......

عبدالعزيز قاطعها وحط صبعه على شفايفها : قتلج مافيني شي .. بس شوويه تعب لان مب راقد عدل اتييني هالحالااات اوقاات

مريم : خلاص اووكييك براحتك .. ورااحت

بعدهااا حركوا ووصلوا بيت جد مريم .. ومريم سارت عند الحريم .. وعبدالعزيز سار الميلس عند الرياايييل .. وتم يسلم عليهم .. وشااف صقر ..

عبدالعزيز بدون نفس : مرحبااا

صقر نفس الشعوور وبهمس : ولا مرحبتييين

عبدالعزيز : ما بتيووز انت ..؟؟

صقر : مثل ما انت ماراح تيوووز .. صدقني يا عبدالعزيز بيي يووم وبتندم .. انطر علي شووي

عبدالعزيز بهمس : انا للحين مب فاهمك ومب فاهم ليش تتصرف معي جي

صقر : بتفهم بس اصبر شوووي

عبدالعزيز شافه بطرف عيينه : الله يهدييك ويصلحك وراااح عنه .. وطوول الوقت صقر يناااظره بنظرات احتقااار .. وعبدالعزيز مطنش ..




في الامارات ..

جاسم كان يالس فبيت عمه عند منصووور .. وسواالف وحالتهم لله .. بعدهااا موبايل جااسم رن ..

جاسم اول ماشاف الرقم ابتسم ورد على طول : يالله حيييه .. هلااااا بشييييخه البنااات

آمنه : هلا هلاااا ... اونه شيخه البنات وانت ولا تسأل عني ولا تتصل

جاسم : جب عااد .. انا كله اتصل وانتي ولا تفكرين .. وبعدين انا مب يالس على بنك .. اتصلج 24 ساعه .. خبرج انتي الحيين فبلااد ثاانيه .. ومصاريف مكااالمتي وياااج اكثرررت ..

آمنه : من يوومك زطي .. المهم قوولي اخباارك ..؟؟

جاسم : بخيير ربي يعاافيج .. ومن صووبكم ..؟؟

آمنه : يسرك الحال ولا يضررررك .. الا انت وييين ..؟؟

جاسم : والله يالس فبيت عمي عند منصوور .. ويغمز لمنصوور ..

آمنه يوم سمعت طارييه مدري شو استوابها : اهااا .. عيل اخلييك تيلس ويا ولد العم

جاسم : بدرررري

آمنه : بدررري من عمررك .. وبعدين حتى انا مصاريف مكالمتي وياااك بتكثر

جاسم ضحك : ههههه مالت عليييج

آمنه : اغصان الجنه انشالله .. يلا استودعك

جاسم : ماتيووزيين .. يلا بباي

آمنه : استغفر الله .. قووول مع السلامه

جاسم ضحك : هههه مع السلامه

آمنه : بباي خخخ .. وسكرت الخط على طووول

جاسم تم يضحك على اخته الهبله ..

منصوور : بلاك ..؟؟

جاسم : اضحك على حاال اختي .. ربي يهدييها ويصلحهاا

منصوور : جاسم شرايك انرووح قطر ..؟؟

جاسم استغرب : لييش.؟؟

منصوور : هاا .. لا ولا شي .. انا برووح هنااك لسعووود .. ومنها انت اتشوف اخووك واختك

جاسم : والله مدري .. خبرك انا مقدم على شغله ..

منصوور : يلا كلها يووميين

جاسم : يلا انرووح وامرنا لله .. بس خلني اضبط اوضاااعي

منصور ابتسم : ضبط يا رياال وخذ راحتك بعد

جاسم رد له الابتسامه ..


وفي قطــر

مريم وعبدالعزيز وهم رادييين البيت ..

عبدالعزيز : انا مدري وش به ولد عمج علي

مريم وهي تلعب سعوود : اي ولد عم ..؟؟

عبدالعزيز : وفي غييره حااط دووبه من دووبي .. صقر

مريم من سمعت اسمه ارتبكت وتوترت : ليييش .. شفـ....يــه

عبدالعزيز : مدري عنه .. يقول كلااام مدري من ويين

مريم : خله يولي عنك .. هاي وااحد مب صاحي

عبدالعزيز شافها وابتسم : صدقتي



ومن صوووب عهووود .. كانت يالسه بالحجررره .. وحالتها كسييفه ... وخصوصاً ان قاعده اتشووف معامله نااصر لآمنه ... وكانت راده الباب ومب مسكرته ..

عهوود : ياربي انا ليش جي حظي بهالدنياا .. حبيت انسااان مايعرف عن هوا داري .. ومعلقه عمري علييه .. ليش جي .. احبه وربي احبه .. سنتييين وانا جي معلقه .. وولا حد حاس فيني .. وخصوصاً اهوو بالذات .. وربي تعبت وحالتي تعبت اكثر .. اوقات احس ان يبادلني .. واوقات اقوول لا يا عهوود مالج أمل .. هو يحب غييييرج .. اييييه هو يحب غيييرج يا عهووود .. كل شي وااضح .. وشو مفكره نفسج عشان ناصر يحبج ..؟؟ .. ناصر مايفكر فيييج اصلن وولا مره جيتي على باااله .. اااااااه على هالدنيااا .. ربي كريييم

عهوود كانت تكلم عمرها ولا منتبهه ان في حد قاعد يسمعها

......: معقوووله عهوود تحب ..؟؟ وتحبــ .......


وانتظروا الجزء الرابع و العشرين

[راضـ نمله ـخ]

تاجزء الرابع و العشرين


ومن صوووب عهووود .. كانت يالسه بالحجررره .. وحالتها كسييفه ... وخصوصاً ان قاعده اتشووف معامله نااصر لآمنه ... وكانت راده الباب ومب مسكرته ..

عهوود : ياربي انا ليش جي حظي بهالدنياا .. حبيت انسااان مايعرف عن هوا داري .. ومعلقه عمري علييه .. ليش جي .. احبه وربي احبه .. سنتييين وانا جي معلقه .. وولا حد حاس فيني .. وخصوصاً اهوو بالذات .. وربي تعبت وحالتي تعبت اكثر .. اوقات احس ان يبادلني .. واوقات اقوول لا يا عهوود مالج أمل .. هو يحب غييييرج .. اييييه هو يحب غيييرج يا عهووود .. كل شي وااضح .. وشو مفكره نفسج عشان ناصر يحبج ..؟؟ .. ناصر مايفكر فيييج اصلن وولا مره جيتي على باااله .. اااااااه على هالدنيااا .. ربي كريييم

عهوود كانت تكلم عمرها ولا منتبهه ان في حد قاعد يسمعها

......: معقوووله عهوود تحب ..؟؟ وتحب بعد نااصر .؟!!

وبسرعه رااحت حجرتهاا .. وكعادتها خذت فرشاة الالواان .. وتمت ترسم وتشخبط .. ودمعة عيونها .. بدمعة قهــر .. ماتدري لييش .. وحست بضيق بقلبهاا .. وبخاطرها شفيني أناا .. ليش مب راضيه افهم عمـــــري .. شسبب هالدموع الي بعيني .. معقوله احبه .. لا خسي ويني ووين الحب .. وليش اتعب باالي .. عهود تحبــه .. الله يووفقهم .. وتنهدت وقالت الله كريم ..

شوي والا موبايلها يرن .. وكاان سعووود ..

آمنه مسحت دمووعها وعدلت صووتها وردت عليه : ألوووو

سعووود : يااا هلا ومرررحبااا

آمنه ابتسمت : اهليين وسهليين ..

سعوود : اخبااار القمر ..؟؟

آمنه : يسأل عنك .. اخبارك انت .؟

سعوود : بخييير .. هااا الحلوو وين يبي يرووح اليووم ..؟؟ .. فخااطري اطلعج .. من ييتي وماطلعتج طلعه محترمه ..

آمنه من غير نفس : لا مالي خلق اظهر

سعود وحس ان آمنه بها شي : ليش امووون في شي ..؟؟

آمنه : يس في .. انك يالس تلعوزني الحين .. وانا مالي بارض لك

سعود ضحك : مالت عليج وعلى ويهج خخخخ ... هاي جزاااتي اني ابي اطلعج

آمنه : ههههههه انشالله غييير اليووم اتظهرني .

سعود : كييفج انتي الخسرانه .. يلا اخلييج الحيين .. برووح ادبرلي طلعه اطلعهاا

آمنه : هييه بس تحمل اترووح اهني او اهناااك

سعود : جب يلا .. المهم بباااي

آمنه تذكرت جاسم : مع السلامه خخخ وسكرت الخط

اول ماسكرت الخط .. كل الاحداث عندها انخلطت فبعض .. تذكرت اخواانها وابووها .. وحست انها تباهم الحييين .. وتذكرت موووزه .. مووزه اللي من بعد ما سارت قطر وصارت ماترمسها شرات اول .. تباها الحين .. هي بحااجتها الحييين عسب تشكييلها الحااال .. بس ماتبااا اتزييدها اكثر من اللي هي فييه الحييين .. تنهدت بالقوو .. خلاص المفرووض انسى .. يلا ربي كريييم .. وانسدحت .. ماحست عمرها الا هي رااقده ..


فبيت بو محمد ..

دانه كانت حالتها لله .. ماتدري عن فيييصل .. هو لا يشبك ولا يسأل عنهااا .. ليش ياربي ..؟؟ .. انا سويت شي يزعله .. اووووف .. الا عهوود تدخل عليهاا ..

عهود : انتي اربع وعشرين سااعه مجابله النت .. روحي رقدي ارتاحي .. طلعي .. تراج لوعتي جبدناا

دانه بقهر : وانتي شدخلج

عهود وهي طالعه من الغرفه : بوومه .. وايد عليج ترقدين ساعتين .. وطلعت بدون ماتسمع ردهاا ..

ونزلت الصاله وكان اخوها محمد موجود ومعه شووق ..

عهود : هلا والله بعروستنا ..

شوق انحرجت : ههه هلا فيج حبيبتي

محمد بهمس : لاتقولين لها حبيبتي

شوق ابتسمت : ان شااء الله

عهود تناظر محمد بنص عين .. : خف عليناا ..

شوق ومحمد ضحكوا .. وبعد شووي دخل راشد ومعه سلطان وخالد .. وعدلوا البنات شيلهم ..

الشباب : السلاام عليكم ..

الجميع : وعليكم السلااام

راشد : انتظروني .. دقيقه ببدل وبجيكم .. وراح عنهم ..

محمد : وين رايحين ..

خالد : سيلين ..

سلطان : شرايك تجي معناا

محمد يناظر شووق : اروح معهم ..

شوق : لاا

محمد : ههههههههه مايرضون اروح معكم ..

سلطان : استريح والي يسلمك .. ترا انجاملك .. ولا مب فاضين لك احناا ..

محمد : أي هيين .. من بيروح معكم ..؟

سلطان : الشباااب

محمد : صدق .؟! حسبت البنات هاهاها ..

خالد : ياحييج يا شووق على ولد خالج .. ظرافة دم على الاخيـر

عهود تمت تضحك عليه .. وتكمل ..: أي وين بتحصل لها واحد يمسيها ويصبحها على ظرافة دم ..

سلطان تم يناظرها ويضحك .. : صدقتي يا بنت خالي .. ويغمز لشووق .. حركات شوااقه ..

محمد : اقول عطيتكم وجه زيااده .. يلا قلبوا وجيهكم .. هذي عمتك شووق .. اونه شواقه

سلطان يغمز له : شفيه الي يغآآر ..

محمد : يلا شووق .. قومي نروح البيت العود ..

شوق وهي قايمه : يلا .. ومسك يدها وطلعوا .. بس ماسلموا من تعليقاتهم لما عند البااب ..

ام محمد : انتوا ماتيوزون عن سوالفكم ..

خالد : شرايج مرت خالي تعرسينا هههههه .. احنا بحسبة عياالج ..

ام محمد : ابشر من الحين ادورلك .. بس انت امر ..

سلطان : أي ولا تنسووني ..

خالد بعبط .. : لا وين ننسااك .. ام محمد ها شرايج تعرسينا بنااتج ..

سلطان : يس عليك نوور .. وين بنحصل احسن عنهم ..

ام محمد بمزح : بسم الله على بناتي منكم هههههههه

وتموا يضحكوون .. وعهود مطنشه وتلعب بموبايلها .. وسلطان يناظرها .. وهي حست بنظراته بس مطنشه .. وبعدها دخل عليهم رااشد ..

راشد : يلا مشيناا ..

سلطان وخالد قاموا : يلاااا .. وبعدها طلعوا ..

وفي الامـــــارات ..

في بيت بوجاسم .. الكل يتجهــز للسفــر لأن باجر موعد سفرهم ..

أم جااسم .: جـااسم

جاسم بزهق : هلا اميييه

أم جاسم : ابااك توديني الموول ..

جاسم : امممممايه .. والدريول وشو شغلته ..

أم جاسم : مامنك فااايده ..

جاسم : خلاص امييه .. بوديج وامري للـــــه ..

وعند فهد وسلطان .. خلصوا تجهيزهم .. ويالسين بالميلس يلعبوون سوني .. مع ربيعهم محمد ..

فهد : والله ماتعرفون تلعبوون .. خخخخ بالذمه هاي لعب حموود

محمد : اسكت زين .. توني صاكك 3 صفر وترمس ..

فهد يبا يظهر نفسه من الموضوع قبل لا يتمصخر : انزين يلا انا بسير ارمس بالفون وبرد ..

محمد : ارمس اهنا .. ولا من ورانا عندك سووالف

فهد : جب زيين ..

سلطان : هيين لا علمت امي علييك ههههههه .. اخليها تنسيك الموبايل

فهد طنش لهم وظهر .. وسار الحوي واتصل على اخته امنه ..

وعند آمنه يالسه تقرا قراان بالصاله عند جدتها .. واول ماخلصت شافت موبايلها يرن .. كانت حاطتها على الصامت .. وردت عليه

آمنه : السلام عليكم ..

فهد : وعليكم السلااااام هلا بالحب ..

آمنه ابتسمت : هلا فهوودي شحالك يااقلبي

فهد : بخير حبيبتي .. مشتااقلج يابعد عمري

آمنه تكمل معه : وأنا مشتاقتلك بزوود .. يصير تبعد عني هالكثر .. ما استحمل بعدك

فهد : شو اسووي يا حبيبتي .. ماكان ودي بس الظرووف جبرتني

بهاللحظه منصور دخل يجيب الاغرااض .. وأشر له منصور بيده معنى من الي تكلمه .. فهد وخر السمااعه .. وقال له ان آمنه .. ويلس احذااه وهو يرمس ..

آمنه : المهم علوومك ياقلبي وشمسووي من بعدي

فهد : فرااقج علة العله .. اااخ مشتاقلج مب قادر استحمل ..

آمنه ماقدرت تستحمل وضحكت ..

فهد : منصوور يسلم علييج ..

آمنه تذكرت رمسته : الله يسلمك ويسلمه ..

فهد : بعطيج تسلمين علييه ..

آمنه : اووك

منصوور : السلام عليكم

آمنه : وعليكم السلام .. شحالك

منصور : طيب الله يسلمج .. ومن صووبج

آمنه : بخيير .. شحال مرت عمي .. وسميه واحمد

منصور : كلهم بخيير .. شحال قطر معج .. اكيد اشتقتي لنا

آمنه : كلهم بخييير .. هيه واايد ههههههه .. جدتي تسلم عليكم ..

منصور : الله يسلمها .. عطيني اياها اباا ارمسها ..

آمنه : عيب تراها مرتبطه

منصور ضحك : ههههههه اقول عطيني وانتي ساكته

آمنه : ان شاء الله عمي .. وشافت جدتها .. : امايه منصور ولد عمي يبا يرمسج

فهد يرمس منصور من صوب ثاني : هييي رصيدي ههههه

منصور : اسكت شووي .. وبهاللحظه خذت الجده الموبايل

الجده : السلام عليكم

منصور منحرج كان يستهبل وكل شي جه على راسه خخخ : وعليكم السلام .. شحالج يدووه

الجده : بخير الله يسلمك ويرضى عليك .. اجل انت ولد حمدان

منصور ابتسم : هيــه ..

الجده : شحالها أمك .. ان شاء الله بخير

منصور : الحمدلله بخير ماتشكي باااس .. وان شاء الله جريب بتجيب لنا أخوو

الجده أستاانست : مبرووك .. الله يسهل عليهاا .. وسلم عليهم كلهم ياولدي .. خذ امنه .. وبهاللحظه ناصر ونايف دخلوا البيت

وآمنه راحت الصاله الثانيه ترمسهم .. وعند الجده .. دخلو نايف وناصر وسلموا على الجده ويلسوا احذاهاا ..

نايف : يمه من الي تكلمونها ..

الجده : هذا ولد عم آمنه واخوهاا .. وتمت تسولف عنهم ..وناصر قلبه محتررق ونايف ماسك ضحكته على تعابير وجه نااصر ..

ومن صووب آمنه .. كانت بتسكر خلاص .. وفهد كان حااط ع السبيكر عسب الاثنين يرمسوونها بوقت واحد

آمنه : اوكيك خذتوا من وقتي وااايد ..

فهد : بل ما تغشمرييين ..

آمنه : هييه .. المهم توصوون بشي ..؟؟

فهد و منصور : سلامتج ..

آمنه بعبط : يلا استودعكم .. وللتواصل يمكنكم التحدث معي على بريدي الالكتروني .......... @ هوتميل دوت كووم ... (( آمنه كانت تستهبل وماتوقعت ان منصور راح يحفظه ))

فهد : اوووب اوووب حررركات ظهرتيييلج ايميل .. من ويين اتعرفيين هالسوالف .. انتي حدج التلفزيون

آمنه : هاهاها والله انك نكته .. انا الحين بزبز ومن .. مايحصلك مثلي ..

فهد : انزين فكييينا .. يلا نخلييج

منصوور يرمس فهد : عييب اترمس اختك العووده جي

فهد : اسف عمي .. المهم يا اختي العزيزه والحبيبه .. اخليج الحين ترتاااحيين وتااخذين وقت ترتااحيين فييييه ..

آمنه : حررركات من وين لك هالذرابه كلهاااا

فهد : لعيوونج كل شي يصييير

آمنه : تحرجني انت جي .. المهم يلا بباي وسكرت الخط وماخلتهم يردوون علييهااا خخخخ .. وبعدهاا راحت يلست عند خالها وناصر وجدتهااا

ناايف : هاا اخباارهم الشبااب ..؟؟

آمنه : بخييير ..

ناصر يطالعها بنظرااات .. وآمنه فاهمه نظراااته .. لان تذكرت مووقف الامارات .. ياربي هااي مابينسى .. شسويييله .. خل يطالعني لين ما ينقع .. اوووف منه

نااصر : المهم انا بروح البيت .. وآمنه بهالوقت تذكرت سعووود ... وقالت انها بترووحله

آمنه : بجي معك

ناصر رفع حاجبه : ليش انشالله ..؟؟

آمنه : لاني ابا اشووف سعووود

ناصر : انزييين .. يلا جلدي ..

آمنه : نص ثاانيه .. البس نعالتي واجيييلك ..

ناصر : اوكيك يلا .. وكلم يدته : هااا تامريني بشي يالغاليه ..؟؟

الجده : سلامتك ورضاااك يا ولدي .. ربي يرضى عليك ويوفقك دنيا وآخره .. وينولك اللي فبااالك

نااصر ابتسم وراح باس راسها : آآمييين




في الامــ،،،ــــارات

عند مووزه كانت تقرا مسجااات زاايد واتصييح قهر على اللي استوووى .. اتشووف مسجاااته واتقااارنها بآخر مسج طرشلها اياااه .. مب قادره تستوعب كيف هالرمسه تظهر من بعد كل هالمسجاات اللي كان يطرشلي اياها .. كيييف رااام يقوولي هالرمسه من بعد هالحب .. يعني هو مااايحبني .. ليش بيطلقني ..؟؟ ليش بيدمر مستقبلي وانا فبداايه طريجي وحياااتي .. للحين ما كونتهااا .. وبطلااقي ماراح اكوون هالحيااااه .. خلالاص حيااتي بتنتهي بطلااقي .. هه تنتهي ..؟؟ .. اهي انتهت من زمااااااااان .. من اول ماخذاااني زاايد وجبرووني علييه .. صج هالدنيا مثل ما تفرررحنا .. اييي يوووم ان اياااام تزعلناا .. يقوول هالدنيا يووم لك و10 علييك .. الله كرييم الله كريييم .. ربي يصبرررني .. ومووزه ولا شي كان يتحررك فيها الا دموووعهاا .. كانت مثل النااار تنززل .. وبهالوقت سعييد اخووها دق الباااب .. ودخل .. وشافها بحااااله مب طبيعيه .. وخاااف عليييهااا ...

سعيييد : مووووووزه حبيبتي بلااج ..؟؟

موزه كانت محتااجه حد بهالوقت .. ما شافت عمرها الا وهي بحضن اخووها سعييد .. واتصييح من خاااطر ...

سعييد وهو متخرررع : موووزه قولي شوو بلاااج ..؟

موووزه وعييينها غرقاانه دمووع : شقوولك يا اخوووي .. اللي ابااهم مايبوووني

سعييد : افاااا من هايييل اللي مايستحوون على ويهم .. في حد مايبا القمررر .؟؟

مووزه نزلت راسهااا : النجوووم

سعييد مات من الضحك : هههههه صدقتي

موزه ردت ولوت على اخووها .. : سعيييد ليش مايبوووني .. انا فيني عيييب ..؟؟

سعييد : شو هالرمسه مواااز .. ليش شو مستوووي .؟؟

مووزه : مدري اكثر اللي ابااهم مايبوووني .. ليش جي ..؟؟؟

سعييد : لانهم مايعرفوون قييمتج .. انتي طيبه .. واحلى مافييج انج ترومين تكسبين محبه اللي يداامج .. واتخليينهم يعشقوون تراابج

مووزه تذكرت زاايد وقلبها عوورهاا .. كاان يحبهااا .. هييه والله كاااااان .. الحين وشو .؟؟؟ .. يمكن ما اعنييله شي

مووزه : سعيييد

سعييد : عيووونه

مووزه : اللي يحب بسرعه ينسى اللي يحبه .؟؟

سعييد شافها وابتسم : مستحيييل .. يمكن يتنااسى .. اما ينسااه هالشي لازم اتعرفييين ان مستحييل .. يمكن ينسااه لكن مب كل انساان .. لكن اللي اعرفه ان الانسان مستحيل ينسى بيوم وليله ..

موزه ارتاااحت يمكن لان تأكدت ان زايد للحيين يحبهااا .. لان سعييد يقوول اللي يحب مستحيل ينسى .. يعني بقدر ارجعه .. واخلييه يردلي .. قبل ما تستوي اي مشكله .. يلا انشالله ارووم

مووزه ابتسمت : احبك

سعييد ناظرها : عيييييييب

مووزه ضحكت .. وسعييد تذكر ليش ياي عندها : هيييييييه صح تذكرت .. نسيتيني ليش يايلج .. يلا تعالي تعشي .. مسويييلج بنفسي احلى عشاا

موزه : انا متأكده مليوون بالميه ان انت اللي مسوييه

سعييد ضحك : جب .. ويلا نزلي ..

مووزه : ثوااااني ..

سعييد : اووكيك .. ونش وغمز لها وساار وسكر الباب ورااه .. ومووزه ارتااحت من رمسه سعييد .. حست فيها رووح .. يمكن رمسته عطت مووزه روووح لجل اتررد حيااتها واتخليها احسن من الاول .. بس هالشي يباله وقت وصبر .. لكني قدها وقدوود ..


وفي قطـــ،،،ـــر

آمنه سارت عند سعوود .. وشافته يتعشى .. وكان جايبله من مااااكدونالدز ..

آمنه فتحت عينها ع الاخير : سعوووووووووووووووووود

سعود تخرع وشافها : بسم الله .. شبلاج .؟

آمنه : شبلاني هاا .. تااكل من ماكدونالدز وماتاخذلي .. هاي وانا اختك .. وحبيبتك .. ونور عينك .. ودنيتك .. وكل شي فييك .. وانت ولا تفكر فيني .. خلاص زعلت وبرطمت

سعود ضحك : ههههه اخذي طلبي لو تبيين .. اصلن طلبي كله فداااج ..

آمنه : لا مابا مابا .. ابا طلب يديد ..

سعوود ابتسم : انزين يلا قوومي اودييج ماكدونالدز

آمنه وهي مستانسه : قووووووول والله

سعود يضحك على اخته : ههههه والله

آمنه :قووول اقسم بآيات ربي ..

سعود : اموون ترا والله بهوووون ..

آمنه : لالا خلاص .. يلا سريينااا .. " آمنه كانت قاصده هالحركه .. كانت تبااه يغير جوو "
وهم طالعيين كان ناصر تواا ناازل ..

ناصر : ها ها .. على وييييييييين .؟

آمنه : مب شغلك .. يلا سعود لا نتأخر

ناصر : سعوود وين بتروحون ..؟؟

آمنه : يه قلت ان مب شغلك .. " آمنه كانت مقهوره منه ماتدري لييش .؟؟ .. يمكن من رمسه عهوود "

ناصر فخاطره شفيها هذي : يلا روحوا الله يعيينكم بس .. ورااح عنهم


ومن صووب عهوود وداانه .. كانو رايحين ويا امهم البيت العوود .. وكانت شووق معهم .. وطول الوقت سواالف وعبط ..

دانه : جدتي شرايج اودييج الدييسكو

الجده فتحت عينها : والله انتي مب متربيه ويبيلج تربيه من يد ويديد .. شالكلام اللي اتقوولينه .. استغفر الله

دانه تضحك : لييش عااد .. تدرين انا كل يوم ارووح هناااك

الجده : انتي انسانه ماتستحين ولا تخيلين .. عييب علييج اتقولين هالكلام .. حتى لو كان بس كلام

عهود : عييييب دانووو .. تكلمي عدل

وشووق تضحك على داانه الخبله : فشلتيينا الله يفشلج ..

دانه وميته ضحك : بعد شنسووي قلت شووي نغيير الجووو لوعوا جبدنا بسوااالفهم .. وانا ماحب سوالف الحريم ..

عهووود : مالت عليج احلى سوالف

دانه : عيل اقوولج من الحيين انج عجزتي هاهاها .. وتموا يسولفون وبعدها البنات راحوا الصاله الثانيه يسولفون .. وطبعاً هاي رغبات الست داانه .. والسبه ماتبي تسمع كلام الحرييم خخخخ




سعود و آمنه كانو بالسياره .. وآمنه تخربط فووق راس سعوود

آمنه تغني : قلي ابيييك وامووت فييك لو بالعيوون او بالكلام

سعود : آمنه والله سندرتيني .. بس خلاص

آمنه : احبك احبك احبك هههههههههه

سعود يضحك : ههههههههه حبج برررص

آمنه : هاي يزااتي اني اقولك احبك احبك احبك

سعود وميت ضحك : هههههههههه يوم اقوول انج خبله .. يلا وصلنا قوولي شتبيين ..؟؟

آمنه : ابيييييك وما ابيييهم ..

سعود : بس عااد يلا قوولي شتبيين ..؟؟

آمنه بجديه : امممم الله يطولي بعمرك ابااا سبايسي ماك جكن

سعوود : بس ..؟؟

آمنه : واباا سلطه سيزر

سعود يستهبل : بس ..؟؟

آمنه : واباا ...

سعود قاطعها : بس بس يالدبه ..

آمنه : ومن قالك اني كنت بكمل .. يلا اطلب تراني ميته يووع .. وطلب لهااا وخذوا الطلب وردوا البيت .. وآمنه كانت طوول الوقت تستهبل على سعوود .. وسعوود حس ان بجيتهااا غيرت شووي جوو ..



وانتظروا الجزء الخامس و العشرين

[MissRose]

يلاااا

كمل كمل

بسرررررعه

[.قطري مزيون.]

يالله رضوخ كمل كمل
فديت خشمك والله ابي اعرف ايش بيصير

[راضـ نمله ـخ]

الجزء الخامس و العشرين


عند عبدالعزيز ومريم .. كانو يسولفوون .. ويلعبوون مع سعوود

مريم : حبيبي

عبدالعزيز : عيووونه

مريم : ابي ارووح السووق اشتريلي كم من شغله .. وابي اشتري ثياب لسعوود .. خبرك الحين الولد كبر .. وانا مب ماخذتله شي ... وكل ثياابه صارت صغييره علييه ..

عبدالعزيز : بس جي ..؟؟ .. انا والسووق كلنا فدوه لعيوونج

مريم انحرجت : تسلملي حياتي

عبدالعزيز : بس بشررررط ..؟؟

مريم : آمرني

عبدالعزيز ابتسم : مايامر عليج عدوو .. ابي بووسه .!!

مريم : بس جي ..؟؟ افا عليك انت بس .. وقامت وباسته على خده ..

عبدالعزيز : ايي الحين اودييج .. يلا قوومي لبسي ثياابج

مريم : الحييين بتوديني ..؟؟

عبدالعزيز : عيل متى .. يلا قوومي ..

مريم : اووووكيك .. وراحت بدلت ثيابها وتجهزت


في الامــ،،ـــارات

منصور رد البيت من بعد ما كان فبيت عمه .. وقعد ع الكمبيوتر .. وشبك .. وفتح ايميله وضااف آمنه .. يمكن بهالطريقه راح اوصل لهااا .. واقوولها كل اللي بخاااطري .. بس على الله انها تشبك ..



في قطــــ،،ـــر

آمنه كانت راده من بيت سعوود ورايحه البيت العوود .. دخلت وشافت الكل قاعد .. البنات والشباب وجدها وجدتها .. وحريم خواالها .. وقامت وسلمت علييهم كلهم وقعدت عند البنااات

نايف وناصر كانو قاعدين ومستلميين طلال تعليقاااات .. ويعبطوون علييه .. وطلال معصب ..

عهود كانت اتشووف ناااصر بكل حركه يسويها وتضحك اذا ضحك .. وتبتسم اذا ابتسم .. وآمنه تشووف تصرفاات عهوود .. ومب قادره تستوعب اللي قاعد يصيييير ..

نايف : امووووون

آمنه انتبهت له : عيوووون امووووون

نايف : ويينه سعوود ليش ما جاا ..؟؟

آمنه : لان بكره ورااه دوااام وقال ان بيرقد

ناصر : هالانسان مدري متى بيفضى

آمنه ماردت عليه وتمت اتشووفه للحظه وحده وكملت سوالفها ويا البنااات ..

ناصر : ها اموون ويين تبينا انودييج بااجر .. وتم يضحك لان تذكر موقف المطعم

آمنه : مابا منك شي ..

عهوود : صج والله بتودييينا ..؟؟

آمنه على طوول شافت عهووود .. وكان شكلها مستاااانس ..

ناصر لف ويهه : هههه لا استعبط على امنه

داانه : خلاص عييل .. انا بخلي محمد يضبطنااا ..

آمنه : هييييه داام محمد بيودينا انا راضيه

ناصر شاف آمنه وملاحظ انها متغيره .. وشكلها ماتبي ولا شي منه .. شفيييها هذي ..؟؟؟ .. اكييد فيها شي .. وراح اعرفه ...

محمد : اذا شوااقه تبغى ترووح .. بوديكم من عيووني ..

والبنات كلهم ينتظروون شوق ترد علييه .. وهي كانت تبي تسووي حركة نذاله فيهم .. بس ماقدرت لأن الكل موجود ..

شوق : اكييد ابي

دانه بعبط : ابي ولا أمي

آمنه : لا جدتي ..

الجده : آمري يالغاليــه ..

الكل ضحك .. وبعدها تجهزوا وطلعوا مع محمد ونايف وطلال وناصر راحوا معهم بس بسياره ناصر .. وأول شي مروا مندرين .. وكل وحده طلبت لها العصير الي تبغيــه .. وبعدين دورهم صووب البــحر .. وشاف مكاان فااضي وحلوو .. ووقف سيارته ونزلهم ..

وعند طلال بعد مانزلوا من السياره ... هو ركب قداام .. وتم يستعرض .. ويخرع البناات .. وآمنه بخاطرها تركب ..

آمنه : طلووووووول .. بعد شووي طلال نزل الجامه ..

طلال : آمري يالمزيونه

آمنه تشققت وابتسمت : أباااا اركب معك ..

البنات : هي من صجج اموون ..

طلال : ركبي ..

آمنه بونااسه : صدق

طلال بعبط : هييه .. يلا ركبي .. آمنه ركبت قداام عند طلال .. وتم يستعرض فيهاا .. ومر صوب الشبااب وشخط وغبر عليهم ..

نايف عصب : لابوووووووك يالثوور ..

محمد ويمسح الغباار من علييه .. : أنا اعلمه شلووون ..

وناصر يضحك ..ويصااارخ علييه .. : انزل يلا انزل بالعقال على ظهرك ..

طلال مر من عندهم وبطل دريشته .. وشافوا ان امنه معه ..

نايف بطل عينه على الاخيــــــر : أنززل .. لا يذبحك سعود والله لويدري

آمنه استانست لما سمعت طاري سعود واكيد مايرضى عليهاا .. وابتسمت ..

ناصر : طلوول انزل ابرك لك ..

طلال يلف راسه عند آمنه : ها اموون خلاص ولا بعد ..

آمنه ضحكت ..: ماعليك منهم كمل ..

وطلال شخط وراح عنهم بعييــد .. وبعد عشر دقاايق رجعوا .. ونزلت آمنه

محمد يناظر آمنه : الحمدلله على السلامه

آمنه ضحكت : الله يسلمك .. هههههه .. وراحت عنهم صوب البناات وتموا سووالف وضحك ..

وقرروا البنات يلعبون لعبة جرأه وصراحــه ..

دانه : شرآيكم اناادي الخبلاان .. وتأشر على الشبااب .. وتكمل ..: يلعبون معنا ..

آمنه : سكتي عن يسمعوونج .. مابيخلوونج بحالج ..

دانه ضحكت : ههههه صدقتي .. المهم شرايكم ..

شوق : لا وين يمكن يحرجونا بالاسئله ..

دانه : من صجج أنتي .. أي سؤال ماتبين تجاوبينه شلخي .. ههههههه

آمنه تغمز لها : مع حلولج السريعه .. بس من يناديهم ..

عهود : ظبيوووه ..

ظبيه : افا عليكم .. وراحت صووب الشبااب ..

محمد أول ما شافها : هااا الدبه شتبي جايه صووبنا

طلال : أشكره البناات مطرشينها صوبناا

ظبيه : سكتووووا .. بقولكم .. تبون تلعبوون معناا ..

الشبااب : وشو

ظبيه : جرأه وصراحه خخخخ

نايف يناظر ظبيه : روحي وألحين جاين لكم .. وراحت ظبيه

ناصر : من صجك أنت هههههه

نايف : قووم يلا خل نمصخرهم ههههههههه

محمد : احممم زوجتي معهم ترى

ناصر : تراها اختي قبل لا تصير زوجتك .. وفكنا يااخي .. يلا أمشوو .. ورحوا الشبااب صوب البنات وبخاطرهم متعودين لهم خخخ

طلال : الشيخ طلال وصل ..

آمنه : حيالله بشيخ الشبااب ..

طلال صدق عمره : احمم تعجبيني يا بنت

دانه : اسكت بس صدق عمره ..

طلال : يحق لي والله ..

عهود : زين سكتوا يلا خلونا نلعب ..

آمنه : هيه والله .. انزين نبا قلم .. محمد طلع القلم الي بمخبااته .. محمد : ترا القلم غاالي بس يلا يفداكم ..

ناصر : خف علينا انت وقلمك ..

آمنه : اووووش يلا بنلعب .. وبعدها اخذ نايف القلم ولفه .. وطلع الـسؤال بين نايف وناصــر .. ونايف الي يسأل .. نايف : ها نويصر جرأه ولا صراحه خخخخ

ناصر توهق : جرأه .. الله يعيــن .. نيووف تراني ولد أختك اراف بحالي خخخخ

نايف : لاتوصي حريص .. روح للي تحبها وقوول لهــا أحبـــــج

ناصر ناظره بنظرة استحقاار .. وبعده شااف شووق وقال لها : أحبــــــــج

محمد : أحممم كح كح .. خلاص من اليوم ورايح محد يحبها غيري ..

ناصر : تراها اختي قبل لاتكوون حرمتك ..

نايف : بمشيها لك .. يلا ناصر لف القلم .. واخذ نايف القلم ولفه .. وطلع بين طلال وآمنـه .. طلال الي يسأل ..

طلال : ها اموون جرأه ولا صراحه ..

آمنـه : لااااا الله يعيني .. جرأه ..

طلال يأشر على راسه : تعالي حبي راسي ..

الكل أعترض هالشي والبنات يضحكووون .. وطلال مطنش لهم : يلا أمووووون .. لاتخربون اللعب .. وقامت آمنه وباست طلال على راسه هههههه ..

وناصر يناظرها ومنقهر منه بس تم سآآكت .. وبعدها طلال لف القلم .. وطلع بين شوق ونايف .. وشوق الي تسأل

شوق : ها جرأه ولا صراحه .. نايف : اممم الي يعجبج .. ولا اقول جرأه ..

شوق : قط عمرك بالبحر وتسبح ههههههههه .. نايف : لااااا عااااااد .. ..

شوق : مالي خص القوانين هههههه

نايف : الله كريم .. هين يا شووق .. وراح وقط عمره وتم يسبح خخخخخخ وبعدها نايف لف القلم .. وطلع بين محمد ودانه .. ودانه الي تسأل ..

دانه : جرأه ولا صراحه ... محمد : مب فاضي لكم ههههههه يلا صراحه

دانه حبت تحرج شوق : شكثر تحب شووق .؟

محمد بخاطره مالت عليج : شفتي البحر الي قدامج أكثر منه .. شفتي بعد السما ابعد منه .. باختصار ماله كثر ههههه ..

والشبااب تموا يصفرون ويستعبطوون .. وشوق قلب لونهاا .. خخخخ ونايف تم يعلق عليها ويهزأ فيهاا ومحمد يدافع عنها هههههه .. وتموا يلعبوون وكل شوي يملغون ويخربون
وعلى السااعه 12 وشي رجعوا .. وكلن راح صووب بيتـه ..

الكل رآآقــد الا الآنسـه دانه .. سهرانه على النت تنتظر فيصــــل .. على وعسى يشبك .. بس مافي أمل .. قالت خلاص بتروح ترقد ابرك لهاا .. تعبت وهي تنتظره .. وهو لا همــه ..


وعند فيصــل .. كان يالس بميلسهم .. مع ربعه ويلعب معهم سووني ..وتحدي .. بعد ماخسر قاام وطلع برع وتم يفكر .. وطلع ولاعته .. وباكيت الزقاره واخذله حبه .. وتم يدخن ..


وفي مصـــــر ..

زايد يالس بالبلكـوونه .. ويفكــر في موزه وفي حيآآتــه .. هو يحبها ويباها بس شو يسوي لجل يرضيهاا .. ماعنده الا هالحل .. يمكن يريحها منه .. أو يخليها تفكر عدل بمسرى حيااتهاا .. بعدها دخل دااخل وقط عمــره .. وتم يفكر لما النوم يجيله ..




في قطـــ،،ــر
الصبح .. آمنه نشت من رقادها وراحت الحمام الله يعزكم تغسل ويهاا وتجهزت لجل اترووح ويا مريم .. لانهم اتفقوا بهاليوووم ان آمنه اترووح جرير تشتري لهااا لااب .. وبعد ماتجهزت وكل شي .. اتصلت لمريم

مريم : الوووو

آمنه : الوووات .. هلا والله

مريم : اهليين وسهليين .. ها تجهزتي ..؟؟

آمنه : يس .. وين واصله ..؟؟

مريم : انا وعبدالعزيز الحين واصلين

آمنه تستعبط : وانتي وين ماتروحين لازم الحب ويااااج

مريم انحرجت : ممكن جب

آمنه تكمل عبط : ممكن كجب

مريم : انزين يلا وصلنا نزلي ..

آمنه : اوووووكي .. وسكرت الخط ونزلت .. وشافت عبدالعزيز نازل وداش البيييت

آمنه : هاا عزووووز مب ناوي تجي ..؟؟

عبدالعزيز : الا بجي .. بس قلت اسلم ع المااما قبل ما ارووح .. صارلي يومين مب شايفها

آمنه : اهاا اوكيك .. سلم ع الماما والبابا .. وانا بسير السياره

عبدالعزيز يقلدها : سيري ..


فــي الامارات

جاسم كان يالس يوصل اهله المطااار .. وطبعاً امه ماخلت توصيه وماوصتها لجااااسم .. وكل شووي اتقووله متأكد انك ماتبا اتيي .. وهو خلاص طفر .. وفهد وسلطان يضحكون عليييه ...

جاسم بتملل : اماايه لو حسيت اني محتاااج اي شي بقوول لبورسلي يسويلي اياه

ام جاسم : اعووذ بالله منه ومنك .. عاااد هاي الوحييد اللي لازم تبعد عنه

جاسم يضحك : ههههه وهاي من سابع المستحيلات

وشووي ووصلوا المطاار .. وتموا يودعوون جااسم

جاسم يقول لفهد وسلطان : ديروا بالكم على امي ماوصييكم هاا ..

فهد : امناا بعيوووناا ..

جاسم : انزين يلا انجلعوا ..

وبعدهاا ام جاسم تمت اتصييح وجاسم يهدييها ويقوولها ان كل شي بيكوون بخيير .. وشووي ودخلوا البوورد ..


في قطــــر

عبدالعزيز ومريم وآمنه وصلوا جرير .. وآمنه طلعت رووحهم على ما خذت لها لااب يعجبهااا .. كانت تبي لااب حلوو ومميزااته اووكييك .. وبعدهااا ردوا البييييت .. وعلى طوول اتصلت لداانه عشان تعلمهاا كمن شغله .. وتمت تعلمهااا .. ونزلت لها المسن وهي ماصدقت خبر على طووول شبكت

دانه : اوووب اوووب حركاات يااتج اضااافه .. هاي وانتي تووج مسويه لج ايميل

آمنه : عسب اتعرفين انا مب اي شي والكل يبااااني ويتمنااني .. مشكلتكم مستهزئيين فيني ..

داانه : حررركات بعد .. يلا تبيين تقبليين الاضافه والا لا ..؟؟

آمنه : اكييد بقبلهاااا .. على ما اعتقد هاي فهوود لاني عطيته ايميلي

دانه : ماصدقتي سويتيلج ايميل على طووول قلتيييلهم

آمنه : انا شغلي دووم سريييع يا حووبي ..

وبعدهاا داانه سارت بيت بو فيصل عند نوووف .. وآمنه تمت قاعده ع الكمبييوووتر .. وتتعبث .. لين ما اللي ضايفها شبك ..

.... : مرحبا الساااع ..

آمنه : مرحبتييييييييين ..

..... : اخبااارج ..؟؟

آمنه : بخييييييييييير .. يوو ..؟؟

...... : تمااااام .. عرفتيييني ..؟؟

آمنه : وفي غيييرك .. فهوود بعد من

.......: غلطاااانه ..

آمنه : عيل امنووو ..؟؟

......: انا منصوووور

آمنه من عرفت ان هاي منصوور مدري شو استواابها وعلى طوول سكرت ايميلهااا .. وبعدها نزلت تحت عند يدتها اتسووولف ..

وفي الكوفي شووب .. نايف وناصر مع بعض وهالاياام علاقته مع نايف اكثر عن اول .. لان قبل كل مع سعود اما الحين سعوود ما ينشااف وكل يتعذر بالدوام وانه يبي يرقد ..

نايف : يلا نصوور اعترف ..

ناصر : اقلب وجهك ابرك لك ..

نايف يضحك : ياخي اشكره وااضح .. شفيك تستحي مني ههههههههه

ناصر : صدقني كلمه ثاانيه بطلع ..

نايف : خلاص كلتنا يااخي .. بس يعني شفيها لو اعترفت ترى الحب مب عيب

ناصر تنهد : احبها ارتحت

نايف ابتسم : الله يووفقك .. ليش مب ناوي تعترف من البدايه

ناصر : اصلن مدري اذا احبها بس احس احبها .. بس يمكن هي ماتحبني .. او من تصرفاتها يبين هالشي .. والله مب عارف وش اقول لك . خلها على الله .. وتموا يسولفوون ..


ومر اسبوعين وكلن على همــه سرى .. آمنه وشوق سجلوا بالجامعه بعد ما وافق بوسعود على هالشي وبعدها بتكمل آمنه دراستها بالامارات .. وعهود مالها خلق جامعه .. وقالت تبي تشتغل بس ابوها ماوافق على هالشيء ونصحها بانها تكمل جامعه بس هي عيت ومابغت انها تدخل .. ودانه ونوف خذوا التوفل وتوفقوا .. بس يبون يريحون قبل لايدخلون الجامعه وخصوصا انهم بأجازه الصيف ومالهم خلق دراسه .. ومن صوب موزه حالتها بدت تتحسن .. ورضت بالأمـر الواقع وبخاطرها لا أول ولا اخر وحده بتنفصل .. ومن صووب جآسم عايش حيااته بعد سفـرة أهله ومحد شاغل تفكيره غير كيف ينسى موزه ..

في قطــر في البيت العود عبدالعزيز يالس مع حرمته وامه وابووه .. ويسولفون .. وسعود آمنه خذته عندهاا بعد ماعور راسها عبدالعزيز من كثر مايوصي على وحده .. الي يشوفه كنه الوحيد الي عنده ولد خخخ

وصوب آمنه يالسه تلاعب سعـود .. وتسولف معه كنه يفهمـها .. ودخل صووبهم نايف وشافها ويلس عندهاا ..

نايف : اموونه تحبين اليهال

آمنه : وامووت فيهم .. بس بحدود خخخخ

نايف يناظرها : وشو بحدود بعد ..

آمنه وهي تحاول تشرح له : اممم يعني احب اليهال واحب العب معهم وارمس معهم .. والخ .. لكن في حالة انهم ملغوا وتموا يصيحوون ويعورون راسي .. ماحبهم

نايف : اهااااا

آمنه : وانت تحبهم

نايف : لا ههههههه

آمنه تبتسم له : طيب ليش ..؟

نايف : عشان تاكلين عيش خخخخ .. وبهاللحظه جوال نايف رن وشاف ان ناصر وابتسم .. وبالعماله حط سبيكـر ..

نايف : السلااام عليكم .. هلا بالغالي

ناصر وهو مستغرب وصووته حده تعباان : وعليكم السلااام .. هلا بك .. وينك انت

نايف : افاا وشو هالصوت .. ليكون بس تعباان

ناصر تنهد : حدييييي .. بس توني قايم من الرقااد .. شوي وبتنشط

نايف : اوكي قوم وتجهز وتعال البيت العوود . الا سعود وينه

ناصر : مدري به بس شكله مب رااقد بالبيت

نايف : المهم يلا لاتطوول

ناصر : انزين نيووف .. اموونه وينها ..

نايف تفشل لانه حاط سبيكر وامنه تسمع .. ومن صوب امنه ويها قلب .. بس نايف حاول يرقع : ههههه احذااي تبي تكلمهاا ..

ناصر صدق عمره : ايي عطني اكلمها ..

نايف : يلا اقلب وجهك .. ولاتطوول انتظرك .. وسكر الخط

ومن صووب آمنه منحرجه ماتعرف شتسووي .. وتمت تلهي عمرها بسعـود .. ونايف حس فيهاا ..

نايف : اموون قومي خل نقعد عندهم .. عزوز شكله ناوي يفر راس الشيبه علينا ..

آمنه ابتسمت : ههههه يلا .. وشالت سعود وراحوا صووبهم ..

عبدالعزيز : الله حييه بشيخ الشبااب .. واخذ سعود من يد آمنه ..

نايف يستهبل بالفيت الكلام له : الله يحييك

عبدالعزيز : شتبي انت خخخخ ..

نايف : انت جبت طاري شيخ الشبااب .. واهني مافي شيووخ غيري ..

عبدالعزيز : اسكت .. المهم على اخر الاسبووع بناخذ لنا شاليه .. للاهل .. شرايك

نايف : رايي من رايك ..

عبدالعزيز : ها اموونه شرايج تروحين الشاليهات

آمنه بدلع : أفكـــر

عبدالعزيز : لاتصدقين عمرج بس

آمنه : لا بصدق .. وناظرت مريم .. : مريم شرايج اوافق ولا لا ..

مريم ابتسمت لها : برآحتج حبيبتي .. وغمزت لهاا ..

آمنه : رايي من رايكم .. يلا بسير اسويلكم عصيــر من يدي

عبدالعزيز : سيري ولاتطولين هههههه

آمنه طنشت وراحت المطبخ تسووي لهم عصير .. وبهاللحظه دخل نااصر وسلم عليهم .. ويلس عند ناايف ..

نايف : نصوور

ناصر : هاااا

نايف : تبيها ههههههههه

ناصر : بلعن شكلك .. لاتحسفني اني قلت لك ..

نايف : تدري فضحتني مسااعه .. وانا اكلمك حاط على السبيكر ..

ناصر قلب ويهه : يعني سمعتني .؟

نايف : لا ههههههه كانت مسكره أذنها خخخخ

ناصر : يا ظرافة دمك .. المهم وينها .؟

نايف : المطبـخ .. تسويلنا عصير ههههههه

ناصر : برووح لها ..

نايف : يالثور أركد لاتفضحنا وتسبب لنا مشاااكل ..

ناصر : ياا رجال ماعليك أنت .. وقام وراح صووب المطبخ .. ودخل المطبخ وشااف آمنه ..

ناصر : ها شتسووووووين ..

آمنه : ارقص .. بعد شسووي ماتشوفني شسوي

ناصر : بل بل كلتيني .. مايسوى علي أني سألتـج ..

آمنه ومالها خلقه كل ماتشوفه تتذكر كلام عهود وسكتت عنـه ..

ناصر : شكلي ازعجتج ..

آمنه ماقدرت تمسك عمرها وضحكت .. ماتدري ليش بس فيها ضحكه وضحكت ..

ناصر : بل استخفت البنيــه ..

آمنه ابتسمت : خخخخخ .. وخذت الصينيه وطلعت .. وراحت الصاله ووزعت عليهم .. وناصر دخل الصاله ويلس عند نايف .. وكان مبتسم وراحت صوبهم وعطتهم ..

وبعدها يلست عند مريم وتموا يسولفون ويتكلموون عن الشاليه ..

وصوب الشبااب .. قاعدين يلعبوون هـاند ومحمد كان معهم .. وامنه اول مالاحظت عليهم راحت صووبهم ..

آمنه : اباا العب معكم ..

ناصر : هههههههه استريحي .. مانبي نمصخرج

نايف : لا خلوها تلعب هههههه خل نضحك عليها

آمنه : هيه هيه استعبطوا والله اتحدااااااكم .. اذا فزتوا كل واحد منكم له الي يبيه

عبدالعزيز : الله يعينــج ..

محمد : ههههههه مستقويه البنت للحين تبي تلعب .. انسحبي ابرك ..

آمنه : هين .. انتوا لعبوا وبتشوفوون ..

ناصر يبتسم : خسرانه ومشتطه هههههه .. المهم جهزوا طلبااتكم ..

عبدالعزيز : واذا فزتي .. وهاي بالاحلام خخخخ لج من كل واحد الي تبينه ..

آمنه استاانست .. بعدها تموا يوزعون الكروت .. وبعدها بدا اللعب .. مع شوية غش وآمنه تعصب عليهم خخخخ .. وبعد اللعب فااااازت آمنه .. وتمت تمصخرهم عدل وتضحك عليهم خخخخخ

آمنه : احم احم بطلب طلبااتي ..

الشباب : الله يعينا عليج ..

نايف : طلبي

آمنه : أولا خالي نيووف ابااك توديني المطعم ..وثانيا خالي عزوز ابااك تاخذني لفه حول الدوحه ههههه وثالثا حمود انت مب محرم لي عسب اظهر معك .. ابااك ماتتصل على شوق اسبووع كامل .. اهني الكل تم يضحك خخخخخ .. واخيرا يا نووويصــر حسابك هين معي .. اباك تشترلي ايدد نوع موبايل نزل
" وناصر فهم قصدها من الطلب وضحك "

الجميع : ابشري والله يعينا عليج

محمد : اما طلبج لي احلمي انفذه هههههه ..

آمنه ضحكت : خلاص رأفت بحالك .. ابااك تودينا البنات كلنا السووووق وتخلينا اندور لين نشبع << تدري محمد كيف يكره طلعت الاسوااق

آمنه : مايصير خلك على الوعد ..

محمد غصب عنه يوافق : خلاص ابشري خخخخ

في الامــ،،،ـــارات

موزه كانت يالسه ويا حسون اخوها واتسوولف معه .. وتعبط .. عل وعسى انها تنسى او تتناسى ..

موزه : احلف انت بس .. قوول والله

حسوون يضحك : هههه عبالج اتغشمر ويااج يالهبله

ام سعيد كانت توها يايه عندها وسمعته : عيييب اتقول عن اختك هبله

موزه راحت عند امها ولوت عليها : شفتييه شو يقول عني .. هاي وانا احبه واعزه اكثر واحد من اخواني

حسن : بل بل ياللوتيه .. شلختي ع السريييع

موزه : شوفي امايه يقول كلاام فااسق وفااجر وعااصي

ام سعيد تضحك على عيالها : ربي يخليكم لبعض ولا يحرمكم من بعض

حسن وموزه ابتسموا : آآميييين وتموا يسولفون .. الا موبايل موزه يرن .. وشافت ان الرقم دولي .. وحد طرا على بالها .. ويها قلب 180 درجه .. وراحت بعيييد عنهم ..

مووزه ردت ع الموبايل : ألووووو

زايد : هلا مووووزه

موزه والدمووع خانتهاا : زااايـــ ....ـــد


وانتظروا الجزء السادس و العشرين

[MissRose]

يلاااااااا


كمل كمل

[.قطري مزيون.]

رضوخ الله يخليك كمل القصه
بندخل العشر الاوخر وبعدين ماعندنا وقت

[qatari@hotmail.es]

خلصنا من سنوات الضياع ونور والحين جاتنا قصة راضخ يا خي نزلها مرة واحدة



ويعطيك العافية على القصةوناطرين الباقي واتمنى انك تزلها كاملة


=== هذه الرسالة تلقائية ===

هذا هو أول موضوع لي في المنتدى . سوف تجد موضوع الترحيب الخاص بي هنا. الرجاء المشاركة في موضوع الترحيب الخاص بي
=== هذه الرسالة تلقائية ===

[.قطري مزيون.]

رضوووووووووووووووووووووووخ وينك وين باقي القصه

[¬°•بنتـے أبويـے]

قصة ولا اروووع..

نتريا الباقي بفارغ الصبر..

والسموحه..


=== هذه الرسالة تلقائية ===

هذا هو أول موضوع لي في المنتدى . سوف تجد موضوع الترحيب الخاص بي هنا. الرجاء المشاركة في موضوع الترحيب الخاص بي
=== هذه الرسالة تلقائية ===

[MissRose]

شنو يعني ما بتخلصون القصه

[ملكه بلا مملكه]

السلام عليكم والرحمه
مشكور يأخ ))((راضخ نمله))((على هالقصه الي أكثر من رائعه...


=== هذه الرسالة تلقائية ===

هذا هو أول موضوع لي في المنتدى . سوف تجد موضوع الترحيب الخاص بي هنا. الرجاء المشاركة في موضوع الترحيب الخاص بي
=== هذه الرسالة تلقائية ===

[فـآ‘ـآ‘رٍس قـطـرٍـرٍ]

كمــل اخووي كمــل

ويعطيك ربي الف عافيــه

[سميتك غلاي]

[align=center]القصه روووووووووووعه ..

نتريا البارتات اليديده ^^ ..

يسلمووووووووو .. [/align]


=== هذه الرسالة تلقائية ===

هذا هو أول موضوع لي في المنتدى . سوف تجد موضوع الترحيب الخاص بي هنا. الرجاء المشاركة في موضوع الترحيب الخاص بي
=== هذه الرسالة تلقائية ===